بارش الرٹ: پنجاب، کے پی، کشمیر اور گلگت بلتستان میں تیز ہوائیں، موسلا دھار بارش اور بعض شہروں میں شہری سیلاب کا خدشہ
فرحین العاص، بیورو چیف اسلام آباد
اسلام آباد: پاکستان محکمہ موسمیات (پی ایم ڈی) نے 11 سے 13 جون 2026 کے دوران ملک کے بالائی اور وسطی علاقوں میں آندھی، گرد آلود ہواؤں، گرج چمک کے ساتھ بارش اور بعض مقامات پر ژالہ باری کی پیش گوئی کی ہے۔
محکمہ موسمیات کے مطابق مغربی ہواؤں کا ایک سلسلہ 11 جون کو ملک کے بالائی علاقوں میں داخل ہوگا اور 13 جون تک اثر انداز رہے گا۔
بحیرہ عرب سے آنے والی مرطوب ہوائیں بھی موسمی سرگرمیوں میں شدت پیدا کریں گی۔
پنجاب اور اسلام آباد میں بارش کا امکان
اسلام آباد، راولپنڈی، مری، گلیات، لاہور، گوجرانوالہ، سیالکوٹ، فیصل آباد، سرگودھا، ملتان، بہاولپور، ڈی جی خان اور دیگر کئی اضلاع میں آندھی اور گرج چمک کے ساتھ بارش متوقع ہے۔
محکمہ موسمیات نے بعض علاقوں میں موسلا دھار بارش اور ژالہ باری کا بھی امکان ظاہر کیا ہے۔
کشمیر اور گلگت بلتستان میں شدید موسمی سرگرمیاں
آزاد کشمیر کے مختلف علاقوں، جن میں مظفرآباد، وادی نیلم، راولاکوٹ، باغ اور میرپور شامل ہیں، میں تیز ہواؤں اور گرج چمک کے ساتھ بارش کی پیش گوئی کی گئی ہے۔
اسی طرح گلگت بلتستان کے اضلاع اسکردو، گلگت، ہنزہ، استور اور غذر میں بھی طوفانی موسم کا امکان ظاہر کیا گیا ہے۔
خیبرپختونخوا کے مختلف اضلاع متاثر ہوں گے
خیبرپختونخوا کے اضلاع چترال، سوات، دیر، کوہستان، پشاور، مردان، ایبٹ آباد، مانسہرہ، کوہاٹ، بنوں اور ڈیرہ اسماعیل خان سمیت مختلف علاقوں میں بھی آندھی اور گرج چمک کے ساتھ بارش متوقع ہے۔
بلوچستان اور سندھ میں گرد آلود ہوائیں
بلوچستان کے شمال مشرقی اضلاع ژوب، شیرانی، زیارت، قلعہ سیف اللہ، بارکھان اور ڈیرہ بگٹی میں آندھی اور بارش کا امکان ہے۔
دوسری جانب سندھ کے بالائی اضلاع سکھر، لاڑکانہ، جیکب آباد، خیرپور، دادو، گھوٹکی، کشمور اور شکارپور میں گرد آلود ہوائیں اور تیز آندھی چلنے کی توقع ظاہر کی گئی ہے۔
شہری سیلاب اور نقصان کا خدشہ
محکمہ موسمیات نے خبردار کیا ہے کہ تیز ہوائیں، ژالہ باری اور آسمانی بجلی کمزور تعمیرات، بجلی کے کھمبوں، سولر پینلز اور بل بورڈز کو نقصان پہنچا سکتی ہیں۔
اسلام آباد، راولپنڈی، گوجرانوالہ، سیالکوٹ، لاہور اور فیصل آباد میں شہری سیلاب کا خدشہ بھی ظاہر کیا گیا ہے۔
پہاڑی علاقوں میں لینڈ سلائیڈنگ کا خطرہ
بالائی خیبرپختونخوا، گلگت بلتستان اور کشمیر کے حساس پہاڑی علاقوں میں لینڈ سلائیڈنگ کا خطرہ موجود ہے۔ محکمہ موسمیات نے مقامی انتظامیہ اور شہریوں کو احتیاط برتنے کی ہدایت کی ہے۔
سیاحوں اور کسانوں کے لیے ہدایات
محکمہ موسمیات نے کسانوں کو مشورہ دیا ہے کہ وہ موسمی صورتحال کے مطابق اپنی فصلوں کی دیکھ بھال کریں۔
سیاحوں اور مسافروں کو غیر ضروری سفر سے گریز اور دورانِ سفر خصوصی احتیاط برتنے کی ہدایت بھی کی گئی ہے۔
یہ بھی پڑھیں
بجٹ 2026-27: ماحولیاتی تحفظ اور روزگار کے لیے بڑے اقدامات کی تجویز
قتلِ خاموش: لسبیلہ کی عدالت میں ماحول نے انصاف مانگ لیا
متعلقہ اداروں کو الرٹ جاری
پی ایم ڈی نے تمام متعلقہ اداروں، ضلعی انتظامیہ اور ہنگامی امدادی اداروں کو الرٹ رہنے کی ہدایت جاری کرتے ہوئے کہا ہے کہ کسی بھی ناخوشگوار صورتحال سے نمٹنے کے لیے پیشگی اقدامات یقینی بنائے جائیں۔
