Environmental News • Environmental Reports • Farozaan

پاکستان کے ساتھ معاشی روابط مزید بہتر ہوسکتے ہیں،ملائیشین ہائی کمشنر

نیشنل پریس کلب اسلام آباد میں میٹ دی پریس پروگرام کے دوران ملائیشین ہائی کمشنر ڈیٹو محمد اظہر بن مزلان دو دیگر افراد کے ہمراہ بیٹھے ہیں، جبکہ سامنے میڈیا کے مائیکروفون رکھے ہیں۔

پاکستان اور ملائیشیا کے درمیان دیرینہ دوستانہ تعلقات کو تجارت سمیت مختلف شعبوں میں عملی تعاون میں تبدیل کرنے کی ضرورت ہے ۔

اسلام آباد(فرحین العاص) پاکستان میں ملائیشیا کے ہائی کمشنر ڈیٹو محمد اظہر بن مزلان نے کہا ہے کہ پاکستان کے ساتھ معاشی روابط مزید ہوسکتے ہیں۔

انہوں نے کہا کہ پاکستان اور ملائیشیا کے درمیان دیرینہ دوستانہ تعلقات کو تجارت، سرمایہ کاری، تعلیم، سیاحت، مصنوعی ذہانت اور حلال صنعت سمیت مختلف شعبوں میں عملی تعاون میں تبدیل کرنے کی ضرورت ہے ۔ دونوں ممالک کے درمیان معاشی روابط کو مزید مضبوط بنانے کے لیے وسیع امکانات موجود ہیں۔

وہ نیشنل پریس کلب اسلام آباد کے پروگرام ’’میٹ دی پریس‘‘ سے خطاب کر رہے تھے۔ اس موقع پر انہوں نے کہا کہ پاکستان اور ملائیشیا کے درمیان 2019 میں اسٹریٹجک شراکت داری قائم ہوئی۔ جس کے تحت دوطرفہ تعلقات کو مزید مستحکم بنانے کے لیے اقدامات جاری ہیں۔

ہائی کمشنر کی نیشنل پریس کلب آمد پر صدر عبدالرزاق سیال، سیکرٹری ڈاکٹر فرقان راؤ اور دیگر سینئر صحافیوں نے ان کا استقبال کیا۔ صدر این پی سی نے مہمان کو خوش آمدید کہا۔ اور دونوں ممالک کے درمیان برادرانہ تعلقات کو سراہا اور پریس کلب کا دورہ کرنے پر ان کا شکریہ ادا کیا۔

سیکرٹری ڈاکٹر فرقان راؤ نے ہائی کمشنر کو نیشنل پریس کلب کے انتظامی امور، گورننگ باڈی کے کردار، رکنیت، دستیاب سہولیات اور صحافیوں کی فلاح و بہبود کے لیے کیے جانے والے اقدامات سے آگاہ کیا۔

پاکستان اور ملائیشیا کے درمیان تجارتی تعاون

ڈیٹو محمد اظہر بن مزلان نے کہا کہ پاکستان ملائیشیا کے لیے پام آئل کی تجارت میں ایک اہم شراکت دار ہے۔ ان کے مطابق پام آئل کی درآمد کے حوالے سے پاکستان ملائیشیا کے تجارتی شراکت داروں میں چوتھے یا پانچویں نمبر پر آتا ہے۔

انہوں نے بتایا کہ کراچی اور پورٹ قاسم میں پاکستانی اور ملائیشین کمپنیوں کے درمیان خوردنی تیل کی ریفائننگ کے مشترکہ منصوبے بھی جاری ہیں۔ جو دونوں ممالک کے درمیان اقتصادی تعاون کو فروغ دینے میں اہم کردار ادا کر رہے ہیں۔

یہ بھی پڑھیں

گرین سندھ فاؤنڈیشن کی پائیدار شجر کاری مہم

ڈنمارک کی ماحول دوست ترقی سے پاکستان کیا سیکھ سکتا ہے؟

ہائی کمشنر نے اس امید کا اظہار کیا کہ موجودہ تجارتی روابط کو مزید وسعت دے کر سرمایہ کاری اور مشترکہ کاروباری منصوبوں کے نئے مواقع پیدا کیے جا سکتے ہیں۔

ملائیشیا میں پانچ ہزار پاکستانی طلبہ زیر تعلیم

تعلیمی شعبے میں تعاون کا ذکر کرتے ہوئے ہائی کمشنر نے بتایا کہ ملائیشیا کی جامعات میں تقریباً پانچ ہزار پاکستانی طلبہ تعلیم حاصل کر رہے ہیں۔ جبکہ دنیا کے مختلف ممالک سے تعلق رکھنے والے تقریباً دو لاکھ بین الاقوامی طلبہ بھی ملائیشیا میں زیر تعلیم ہیں۔

انہوں نے کہا کہ ملائیشیا پاکستانی طلبہ کے لیے اعلیٰ تعلیم کے حصول کا ایک اہم مرکز ہے۔ جہاں انہیں بین الاقوامی تعلیمی مواقع اور مختلف ممالک کی جامعات کے ساتھ تعلیمی روابط سے فائدہ اٹھانے کے امکانات میسر آتے ہیں۔

دفاعی تعلقات اور اعلیٰ سطح کے روابط

دفاعی تعاون کے حوالے سے ملائیشین ہائی کمشنر نے کہا کہ پاکستان اور ملائیشیا کے درمیان دفاعی شعبے میں مسلسل رابطہ اور تعاون جاری ہے۔ انہوں نے بتایا کہ دونوں ممالک کے درمیان دفاعی تعاون سے متعلق کمیٹی کے اجلاس اگلے دو روز میں منعقد ہونا طے ہیں۔

ہائی کمشنر کے مطابق وزیراعظم شہباز شریف اور ملائیشیا کے وزیراعظم انور ابراہیم کے درمیان قریبی تعلقات بھی دوطرفہ تعاون کو آگے بڑھانے میں مددگار ثابت ہو رہے ہیں۔

علاقائی امن کے لیے پاکستان کے کردار کو سراہا

خطے کی صورت حال پر گفتگو کرتے ہوئے ڈیٹو محمد اظہر بن مزلان نے سعودی عرب پر حملے کی مذمت کی۔ اور سعودی حکومت و عوام کے ساتھ ملائیشیا کی یکجہتی کا اظہار کیا۔ انہوں نے سعودی عرب کو ملائیشیا کا قریبی دوست اور خودمختار ملک قرار دیا۔

انہوں نے علاقائی امن کے فروغ کے لیے پاکستان کی کوششوں کو سراہا ۔ اور کہا کہ ملائیشیا خطے اور عالمی سطح پر امن و استحکام کے قیام کے لیے پاکستان کے کردار کو قدر کی نگاہ سے دیکھتا ہے۔

ہائی کمشنر کی پریس کلب کے لان میں شجرکاری

پروگرام سے قبل ملائیشین ہائی کمشنر نے نیشنل پریس کلب کے لان میں پودا لگایا۔ اور شجرکاری مہم میں حصہ لیا۔ اس موقع پر انہیں پریس کلب کے مختلف شعبوں کا دورہ بھی کرایا گیا۔

تقریب میں صدر نیشنل پریس کلب عبدالرزاق سیال، سیکرٹری ڈاکٹر فرقان راؤ اور دیگر عہدیداران و صحافی بھی موجود تھے۔ ملاقات میں پاکستان اور ملائیشیا کے دوستانہ تعلقات، باہمی تعاون کے امکانات اور دونوں ممالک کے عوام کے درمیان روابط کو مزید مضبوط بنانے کی اہمیت پر تبادلہ خیال کیا گیا۔

اپنا تبصرہ لکھیں