Environmental Reports • Farozaan

1970 کی دہائی کے توانائی بحران، موسمیاتی سیاست پر اثرات

1970s Energy Crises and Their Impact on Climate Politics

توانائی بحران، تیل بحران اور سرد جنگ نے موسمیاتی کوششیں مشکل بنائیں، پائیدار ترقی سے عالمی تعاون کی راہیں کھلیں

1970 کی دہائی کا ذکر ہو تو ذہن میں بیل باٹم پتلون کا فیشن، ڈسکو موسیقی اور فلمی سلسلے ’اسٹار وارز‘ کا آغاز آتا ہے۔ تاہم، یہ دہائی امریکا میں ماحولیاتی تحریک کے فروغ کے حوالے سے بھی اہم تھی۔ اسی دور میں 22 اپریل 1970 کو پہلی مرتبہ ملک بھر میں ’یومِ ارض‘ منایا گیا۔

ماحولیاتی تاریخ اور سائنس کی تاریخ کی محقق لیہ آرونووسکی کے مطابق، 1970 کی دہائی ان کی زیرِ تکمیل کتاب کے تحقیقی سفر کا نقطۂ آغاز ہے۔

کولمبیا کلائمیٹ اسکول میں موسمیات کی اسسٹنٹ پروفیسر اور پائیدار ترقی کے انڈرگریجویٹ پروگراموں کی شریک سربراہ لیہ آرونووسکی نے موسمیاتی اور توانائی پالیسی کی تاریخ، موسمیاتی تبدیلی سے انکار کے رجحان اور ان عوامل کے موجودہ پالیسی جمود پر اثرات کے بارے میں گفتگو کی۔

ان کا کہنا ہے کہ ان کی تحقیق کا تعلق موسمیاتی تبدیلی اور توانائی کی سیاست کی تاریخ سے ہے۔ اس کا آغاز 1970 کی دہائی کے آخری برسوں سے ہوتا ہے۔ اس وقت دنیا کے کئی معروف ماہرینِ موسمیات اس بارے میں شکوک و شبہات رکھتے تھے کہ آیا موسمیاتی تبدیلی کو روکا بھی جا سکتا ہے یا نہیں۔

ان سائنس دانوں میں راجر ریویل، والیس بروکر اور والٹ رابرٹس جیسے نام شامل تھے۔

آرونووسکی کے مطابق، ان سائنس دانوں کی مایوسی کی ایک بڑی وجہ اس دور کے سیاسی حالات تھے۔ وہ 1973 کے تیل بحران کے باعث پیدا ہونے والی سماجی اور معاشی افراتفری کا تجربہ کر چکے تھے۔ اس کے علاوہ انہیں خدشہ تھا کہ کوئلے کے بڑے ذخائر رکھنے والی سرد جنگ کی عالمی طاقتیں کسی بڑے تصادم کی جانب بڑھ رہی ہیں۔

ان سائنس دانوں کے نزدیک تیل، گیس اور کوئلہ عالمی معیشت اور سیاسی نظام کی بنیاد تھے۔ ایسے میں موسمیاتی تبدیلی روکنے کے لیے ان ایندھن کا استعمال ترک کرنا ایک انتہائی مشکل سیاسی جدوجہد ثابت ہو سکتا تھا۔

کاربن ڈائی آکسائیڈ کے انسانی اخراج سے زمین کے درجہ حرارت میں اضافے کی ابتدائی پیش گوئی کرنے والے سائنس دان والیس بروکر کو 1973 میں شائع ہونے والے ایک تحقیقی مقالے میں ’عالمی حدت‘ کی اصطلاح سائنسی زبان میں متعارف کرانے کا اعزاز بھی دیا جاتا ہے۔

تصویر: والیس بروکر 1996 میں امریکی صدر بل کلنٹن سے قومی تمغۂ سائنس وصول کرتے ہوئے۔

والیس بروکر 1996 میں امریکی صدر بل کلنٹن سے قومی تمغۂ سائنس وصول کرتے ہوئے۔

عالمی برادری موسمیاتی تبدیلی روکنے کے لیے کیسے متحد ہوئی؟

آرونووسکی کے مطابق، 1970 کی دہائی کے حالات کو دیکھتے ہوئے یہ بات حیران کن ہے کہ دنیا بعد ازاں موسمیاتی تبدیلی روکنے کے لیے متحد ہونے میں کامیاب ہوئی۔

1970 اور 1980 کی دہائیوں کے درمیان عالمی حالات میں نمایاں تبدیلی آئی۔ اس تبدیلی کے کئی اسباب تھے۔ ان میں ایک اہم پیش رفت ماحولیاتی سیاست کے نئے تصورات کا سامنے آنا تھا۔ ان میں ’پائیدار ترقی‘ کا تصور خاص طور پر اہم تھا۔

وسیع تر تناظر میں یہ خیال بھی سامنے آیا کہ موسمیاتی تحفظ عالمی نظام میں ایک بڑی تبدیلی کا حصہ بن سکتا ہے۔

اس تصور نے یہ سوچ متعارف کرائی کہ معاشی ترقی اور ماحول کا تحفظ ایک دوسرے کے مخالف نہیں بلکہ دونوں مقاصد بیک وقت حاصل کیے جا سکتے ہیں۔

یہ بھی پڑھیں

کوپ 31، گلوبل ساؤتھ کو موسمیاتی فنڈز اور ٹیکنالوجی کی تلاش

کوپ 31، پاکستان کا موسمیاتی فنڈز بڑھانے کا مطالبہ، میتھین پروگرام میں شمولیت

وسیع تر تناظر میں یہ خیال بھی سامنے آیا کہ موسمیاتی تحفظ عالمی نظام میں ایک بڑی تبدیلی کا حصہ بن سکتا ہے۔ اس کے تحت ممالک باہمی تعاون کے ذریعے مشترکہ مسائل حل کر سکتے ہیں۔

1980 کی دہائی کے اختتام تک سوویت یونین کا زوال شروع ہو چکا تھا۔ اس دوران یہ امید بھی پیدا ہوئی کہ موسمیاتی تبدیلی سے نمٹنے کے لیے عالمی برادری کا متحد ہونا آزاد خیال ماحولیاتی سیاست کی ایک بڑی کامیابی ثابت ہوگا۔

اپنا تبصرہ لکھیں