ملک میں ژالہ باری، گرج چمک کے ساتھ بارش کا امکان

اسلام آباد: (فرحین ، نمائندہ خصوصی) محکمہ موسمیات نے خبردار کیا ہے کہ آج سے 4 مئی تک ملک کے مختلف علاقوں میں ژالہ باری، تیز ہواؤں، آندھی اور گرج  چمک کے ساتھ بارش کا سلسلہ جاری رہنے کا امکان ہے۔ اس موسمی صورتحال کے دوران کمزور انفراسٹرکچر کو نقصان پہنچنے کا خدشہ ظاہر کیا گیا ہے۔

محکمہ موسمیات کے مطابق ہفتے کے روز کشمیر، خیبرپختونخوا، خطہ پوٹھوہار، اسلام آباد، شمال مشرقی و وسطی پنجاب، شمال مشرق بلوچستان اور گلگت بلتستان میں ژالہ باری کے ساتھ بارش کا قوی امکان ہے۔ بعض علاقوں میں موسلا دھار بارش بھی ہو سکتی ہے۔

ژالہ باری کا دائرہ کار

اسلام آباد اور گرد و نواح میں جزوی طور پر ابر آلود موسم کے ساتھ آندھی اور گرج چمک کے علاوہ ژالہ باری کی پیش گوئی کی گئی ہے، جو شہریوں کے لیے خطرناک ثابت ہو سکتی ہے۔ اسی طرح پنجاب کے کئی اضلاع جن میں لاہور، سیالکوٹ، گوجرانوالہ، نارووال، قصور، فیصل آباد اور ڈی جی خان شامل ہیں، میں بھی ژالہ باری اور موسلا دھار بارش کی توقع ہے۔

خیبرپختونخوا کے چترال، سوات، ایبٹ آباد، مانسہرہ، پشاور، بنوں، ڈی آئی خان، مردان اور دیگر علاقوں میں ژالہ باری کے ساتھ بارش کا امکان ہے۔

کشمیر اور گلگت بلتستان میں بھی متعدد مقامات پر ژالہ باری کی پیش گوئی کی گئی ہے، جہاں شدید بارش کے ساتھ چھوٹے برفیلے اولے گرنے کے واقعات رونما ہو سکتے ہیں۔

بلوچستان کے ژوب، موسیٰ خیل، کوئٹہ، قلات اور خضدار سمیت بعض علاقوں میں شام یا رات کے وقت ژالہ باری کے امکانات ظاہر کیے گئے ہیں۔

احتیاطی تدابیر کی ضرورت

محکمہ موسمیات نے خبردار کیا ہے کہ ژالہ باری کے باعث فصلوں، گاڑیوں، گھروں کی چھتوں اور سولر پینلز کو نقصان پہنچ سکتا ہے، لہٰذا کسانوں اور شہریوں کو خصوصی احتیاط برتنے کی ہدایت کی گئی ہے۔

گزشتہ 24 گھنٹوں کی صورتحال

گزشتہ روز بھی کشمیر، اسلام آباد، شمال مشرقی و وسطی پنجاب اور بالائی خیبرپختونخوا کے متعدد علاقوں میں آندھی، جھکڑ، گرج چمک اور بارش کے ساتھ ژالہ باری ہوئی۔ مظفرآباد، نارووال، سیالکوٹ، لاہور اور گوجرانوالہ میں نمایاں بارش ریکارڈ کی گئی۔

محکمہ موسمیات کی اپیل

محکمہ موسمیات نے شہریوں پر زور دیا ہے کہ وہ موسمی ایڈوائزری پر عمل کریں اور غیر ضروری سفر سے گریز کریں، تاکہ ژالہ باری موسمی شدت سے ممکنہ نقصانات سے بچا جا سکے۔