پاکستان اور نیپال کا ماحولیاتی تعاون بڑھانے پر اتفاق

 اسلام آباد 13-مئی-2025 (فرحین، نمائندہ خصوصی) وفاقی وزیر برائے موسمیاتی تبدیلی و ماحولیاتی و آہنگی، ڈاکٹر مصدق ملک سے 13 مئی کو نیپال کی سفیر محترمہ ریتا دھیتال نے ملاقات کی، جس میں دونوں ممالک نے ماحولیاتی تبدیلی سے نمٹنے کے لیے قریبی تعاون پر اتفاق کیا۔

ملاقات کے دوران وفاقی وزیر نے اس امر پر زور دیا کہ پاکستان طویل عرصے سے دہشت گردی اور بلاجواز جارحیت کا نشانہ رہا ہے، لیکن ہمیشہ وقار اور اصولی مؤقف کے ساتھ امن کا خواہاں رہا ہے۔ انہوں نے کہا کہ پاکستان کی امن کی خواہش کو کمزوری نہ سمجھا جائے، کیونکہ ملک نے اپنی دفاعی استعداد کا مظاہرہ مؤثر انداز میں کیا ہے۔

ڈاکٹر مصدق ملک نے حالیہ کشیدگی کا ذکر کرتے ہوئے کہا کہ انسانی جانوں کا ضیاع بھارت کی خطے میں بالادستی قائم کرنے کی ناکام کوشش کا نتیجہ تھا، تاہم پاکستان مطمئن ہے کہ اب خطے میں امن بحال ہو چکا ہے۔

سفیر نیپال نے پاکستان کو درپیش چیلنجز کا ادراک کرتے ہوئے دونوں ممالک کے درمیان کشیدگی کے خاتمے پر اطمینان کا اظہار کیا۔ انہوں نے ماحولیاتی تبدیلی کے حوالے سے پاکستان کے قائدانہ کردار کو سراہا اور وفاقی وزیر کو نیپال میں ہونے والے ایک علاقائی ماحولیاتی مکالماتی فورم میں شرکت کی دعوت دی۔

اس فورم میں جنوبی ایشیا سمیت مختلف ممالک کے وزرائے موسمیاتی تبدیلی و ماحولیاتی تحفظ شرکت کریں گے، اور اجلاس کے اختتام پر ایک غیر پابند اعلامیہ جاری کیا جائے گا۔

دونوں فریقین نے موسمیاتی تبدیلی کو موجودہ دور کا اہم ترین عالمی مسئلہ قرار دیتے ہوئے اس سے نمٹنے کے لیے مشترکہ حکمت عملی اور علاقائی تعاون کی ضرورت پر زور دیا۔