کراچی میں 75ویں پاکستان سالانہ پھولوں کی نمائش 2026، سی ویو پر رنگوں کی بہار

کراچی میں ہارٹی کلچرل سوسائٹی آف پاکستان کے زیر اہتمام تین روزہ نمائش، جامعہ کراچی سمیت متعدد اداروں کی شرکت

رپورٹ: ڈاکٹر وقار

کراچی میں سالانہ پھولوں کی نمائش 2026 کا انعقاد شاندار انداز میں کیا گیا۔ یہ نمائش شہر کی ثقافتی اور تفریحی سرگرمیوں کا اہم حصہ بن چکی ہے۔ ہر سال کی طرح اس بار بھی شہریوں اور سیاحوں کی بڑی تعداد نے شرکت کی۔

کراچی کی سب سے بڑی سالانہ نمائش ہارٹی کلچر سوسائٹی آف پاکستان کے زیر اہتمام منعقد ہوئی۔ اسے ’’75ویں پاکستان پھولوں کی نمائش‘‘ کا نام دیا گیا۔

یہ نمائش 13 سے 15 فروری 2026 تک اے کے خان پارک سی ویو میں جاری رہی۔ مختلف کیٹیگریز میں فلوریل ڈسپلے، سجاوٹیں اور نایاب پودوں کی نمائش پیش کی گئی۔

افتتاحی تقریب کے مہمان خصوصی سابق سینیٹر جاوید جبار تھے۔ تقریب میں سوسائٹی کی چیئرپرسن نوشانہ خلیل، وائس چیئرپرسن رعنا سعید، ماحولیاتی ماہر رفیع الحق اور دیگر شخصیات نے شرکت کی۔ مقررین نے پھولوں کے تنوع اور ماحول دوست سرگرمیوں کی اہمیت پر روشنی ڈالی۔

نمائش میں عام شہریوں، طلبہ، باغبانی کے ماہرین اور فطرت سے دلچسپی رکھنے والے افراد نے بھرپور شرکت کی۔ مختلف کمرشل نرسریز اور اداروں کے اسٹالز بھی لگائے گئے تھے۔ رنگ برنگے پھولوں اور تخلیقی ڈیزائنز نے حاضرین کی توجہ حاصل کی۔

جامعہ کراچی نے پہلی بار اس نمائش میں شرکت کی۔ جامعہ کراچی کے شعبہ لینڈ اسکیپ اینڈ گارڈننگ کونسل کے اسٹال پر بائیو فلک مصنوعات خصوصی توجہ کا مرکز رہیں۔

شعبہ ماحولیات کے استاد ڈاکٹر وقار احمد نے کہا کہ پھولوں کی نمائش ایک صحت مند سرگرمی ہے۔ اس سے نوجوانوں میں ماحولیات کے تحفظ کا شعور پیدا ہوتا ہے۔

انہوں نے بتایا کہ وائس چانسلر ڈاکٹر خالد عراقی کی سرپرستی سے جامعہ کراچی کی شرکت ممکن ہوئی۔ ادارے کو نمائش میں مثبت ردعمل ملا اور آئندہ بھی شرکت جاری رکھنے کا عزم ظاہر کیا گیا۔

یہ بھی پڑھیں

پاکستان میں پانی کا بڑھتا بحران: موسمیاتی تبدیلی، آبادی میں اضافہ اور ناقص پالیسیوں کے سنگین اثرات

گلگت بلتستان میں بہار شجرکاری مہم 2026 شروع، 35 لاکھ پودے لگانے کا ہدف

کراچی میں یہ سالانہ نمائش نہ صرف تفریح کا ذریعہ ہے بلکہ شہریوں میں ماحولیاتی آگاہی بڑھانے اور قدرتی حسن کو فروغ دینے کا اہم پلیٹ فارم بھی بن چکی ہے۔