تھرپارکر آفت زدہ قرار، مراد علی شاہ کا بڑا فیصلہ

تھرپارکر آفت زدہ قرار، 90 فیصد فصلیں تباہ، مراد علی شاہ کا پانی اور چارے کی فراہمی کے لیے ہنگامی اقدامات کا حکم

فروزاں رپورٹ

کراچی : وزیراعلیٰ سندھ سید مراد علی شاہ نے تھرپارکر میں خشک سالی اور فصلوں کو ہونے والے شدید نقصان کا جائزہ لینے کے بعد ضلع کو خشک سالی سے متاثرہ قرار دینے کا فیصلہ کیا ہے۔

انہوں نے متعلقہ محکموں کو فوری امدادی اقدامات شروع کرنے اور متاثرہ آبادی کو پینے کے صاف پانی سمیت ضروری اشیا کی فراہمی یقینی بنانے کی ہدایت کی ہے۔

وزیراعلیٰ سندھ نے ہفتے کے روز وزیراعلیٰ ہاؤس میں اجلاس کی صدارت کی۔ اس موقع پر انہیں تھرپارکر کی ساتوں تحصیلوں میں خشک سالی کی صورتحال سے متعلق تفصیلی بریفنگ دی گئی۔

اجلاس میں رکن قومی اسمبلی ڈاکٹر مہیش ملانی، اراکین سندھ اسمبلی دوست محمد راہموں، قاسم سومرو، فقیر شیر محمد بلالانی اور ارباب لطف اللہ، چیف سیکریٹری آصف حیدر شاہ، سینئر ممبر بورڈ آف ریونیو خالد حیدر شاہ، سیکریٹری وزیراعلیٰ آصف جمیل، کمشنر میرپورخاص شاہمیر بھٹو اور دیگر متعلقہ حکام نے شرکت کی۔

بریفنگ میں بتایا گیا کہ تھرپارکر کی تمام ساتوں تحصیلیں خشک سالی جیسی صورتحال سے دوچار ہیں۔ ضلع میں تقریباً 85 سے 90 فیصد زیر کاشت فصلیں تباہ ہو چکی ہیں یا پیداوار کے قابل نہیں رہیں۔

محکمہ زراعت کے شعبہ توسیع نے فصلوں کو تقریباً 90 فیصد نقصان پہنچنے کا تخمینہ لگایا ہے۔ دوسری جانب اسسٹنٹ کمشنرز اور مختیارکاروں کی فیلڈ رپورٹس کے مطابق صرف 10 سے 15 فیصد فصلیں باقی بچ سکی ہیں۔

وزیراعلیٰ سندھ نے بارشوں کی کمی اور غیر مساوی تقسیم کے باعث زراعت، مویشیوں اور تھر کے عوام کے روزگار کو پہنچنے والے نقصان پر شدید تشویش کا اظہار کیا۔ انہوں نے کہا کہ صورتحال سے نمٹنے کے لیے فوری حکومتی اقدامات ضروری ہیں۔

انہوں نے خاص طور پر مویشیوں کے تحفظ پر زور دیا کیونکہ صحرائی علاقے کے لوگوں کی آمدنی اور روزگار کا بڑا ذریعہ مویشی ہیں۔

پانی کی فراہمی اور آر او پلانٹس کی بحالی کا حکم

وزیراعلیٰ سندھ نے چیف سیکریٹری آصف حیدر شاہ کو فوری اقدامات کی ہدایت کرتے ہوئے تمام غیر فعال ریورس اوسموسس (آر او) پلانٹس کی ترجیحی بنیادوں پر مرمت اور بحالی کا حکم دیا۔

انہوں نے پانی کی فراہمی کے موجودہ ذرائع میں خرابیوں کی نشاندہی کرکے انہیں بھی مکمل طور پر فعال بنانے کی ہدایت کی، تاکہ مقامی آبادی کو پینے کا پانی مسلسل فراہم کیا جا سکے۔

مراد علی شاہ نے چیف سیکریٹری کو نوکوٹ سے مٹھی تک پانی کی مخصوص سپلائی لائن بچھانے کے منصوبے کا جائزہ لینے کی بھی ہدایت کی۔ اس منصوبے کا مقصد مٹھی کے شہریوں کو پینے کے پانی کی مستقل اور قابل اعتماد فراہمی یقینی بنانا ہے۔

انہوں نے منصوبے کے تمام تکنیکی اور انتظامی تقاضوں کا ترجیحی بنیادوں پر جائزہ لینے پر زور دیا، تاکہ علاقے میں پانی کی قلت کا مستقل حل نکالا جا سکے۔

چارے کی قلت دور کرنے اور مویشیوں کے تحفظ پر زور

وزیراعلیٰ سندھ نے خشک سالی کے باعث مویشیوں کے چارے کی قلت دور کرنے اور انہیں ممکنہ نقصان سے بچانے کے لیے فوری انتظامات کرنے کی ہدایت کی۔

انہوں نے متعلقہ محکموں کو باہمی رابطے کے ذریعے امدادی سرگرمیاں تیز کرنے اور متاثرہ علاقوں تک بروقت امداد پہنچانے کا حکم دیا۔

یہ بھی پڑھیں

کاپ 31، غزہ سے ایران تک جنگوں کی ماحولیاتی تباہی نظر انداز

گوادر میں 30 فٹ طویل نیلی وہیل مردہ حالت میں ساحل پر آ لگی

ستمبر میں انتہائی کم بارشیں ریکارڈ

بریفنگ میں بتایا گیا کہ 2026 کے مون سون سیزن کے دوران تھرپارکر میں بارشیں غیر مساوی طور پر ہوئیں۔ اگرچہ ضلع کی ساتوں تحصیلوں میں مجموعی موسمی بارش 181 سے 273 ملی میٹر کے درمیان ریکارڈ کی گئی، تاہم ستمبر میں بارشوں کی مقدار انتہائی کم رہی۔

ستمبر کے دوران مختلف علاقوں میں صرف ایک سے 36 ملی میٹر بارش ہوئی۔ اس کے نتیجے میں فصلیں اور قدرتی گھاس پکنے سے پہلے ہی خشک ہو گئیں۔

وزیراعلیٰ سندھ نے یقین دہانی کرائی کہ صوبائی حکومت اس مشکل وقت میں تھرپارکر کے عوام کے ساتھ کھڑی ہے۔ انہوں نے انتظامیہ کو صورتحال پر مسلسل نظر رکھنے اور اس بات کو یقینی بنانے کی ہدایت کی کہ کوئی بھی متاثرہ آبادی ضروری امداد سے محروم نہ رہے۔

انہوں نے کہا کہ حکومت خشک سالی کے اثرات کم کرنے، مویشیوں کا تحفظ یقینی بنانے، پانی کی سہولیات بحال کرنے اور تھرپارکر کے عوام کو ریلیف فراہم کرنے کے لیے تمام ضروری اقدامات کرے گی۔