کراچی: شدید گرمی جاری، بوندا باندی کا امکان

کراچی میں ساحلی پٹی پر جزوی ابر آلود موسم رہنے کا امکان ہے جبکہ چند علاقوں میں ہلکی بارش کی پیشگوئی کی گئی ہے

سمعیہ خورشید

کراچی میں شدید گرمی کی لہر بدستور جاری ہے۔ شہر قائد کے مختلف علاقے گرم اور مرطوب موسم کی لپیٹ میں ہیں۔
محکمہ موسمیات کے مطابق کراچی میں آئندہ 24 گھنٹوں کے دوران موسم زیادہ تر گرم اور حبس والا رہے گا۔
تاہم رات اور صبح کے اوقات میں بعض علاقوں میں ہلکی بوندا باندی کا امکان موجود ہے۔

وقفے وقفے سے تیز ہوائیں چلنے کی بھی توقع ظاہر کی گئی ہے، جس سے وقتی طور پر موسم میں معمولی بہتری آ سکتی ہے۔

ساحلی پٹی اور اندرونی سندھ کی صورتحال

محکمہ موسمیات نے بتایا ہے کہ سندھ کی ساحلی پٹی پر مطلع جزوی طور پر ابر آلود رہ سکتا ہے۔
چند مقامات پر ہلکی بوندا باندی متوقع ہے۔

اس سے گرمی کی شدت میں معمولی کمی آنے کا امکان ہے۔

دوسری جانب صوبہ سندھ کے بیشتر اضلاع میں موسم گرم اور خشک رہنے کی پیشگوئی کی گئی ہے۔

کچھ علاقوں میں بارش اور آندھی کا امکان

ماہرین کے مطابق شدید گرمی اور ہوا میں نمی کے باعث کچھ اضلاع متاثر ہو سکتے ہیں۔
جن میں جامشورو، قمبر شہدادکوٹ، جیکب آباد، کشمور اور گھوٹکی شامل ہیں۔

ان علاقوں میں کہیں کہیں آندھی اور گرج چمک کے ساتھ ہلکی بارش کا امکان ظاہر کیا گیا ہے۔

یہ بھی پڑھیں

ہنٹا وائرس: ایک خاموش مگر خطرناک وبا

بھارت ہیٹ ویو: دنیا کے 50 گرم ترین شہر ایک ہی ملک میں

ماہرین کی ہدایت

ماہرین موسمیات نے شہریوں کو احتیاط برتنے کا مشورہ دیا ہے۔
انہوں نے کہا ہے کہ غیر ضروری طور پر دھوپ میں نکلنے سے گریز کیا جائے۔
پانی کا زیادہ استعمال اور احتیاطی تدابیر اختیار کرنا ضروری ہے۔